الشاعر/ الشريف سعد بن الفديع آل صامل
يـنـصــح ابــنــه عـبـدالإلــه

عبدالإلـه اسمـع كلامـي لحالـي===اسمع كلام فيـه موجـز وتمهيـد
يابـوك راحـوا طيبيـن الرجالـي===ولاعاد باقي غير ممـدوح وسعيـد
راح الزناتي وابـو زيـد الهلالـي===طيور جوٍّ تكسـر الحـوم وتصيـد
اهل الكرم واهل الشحـم والدلالـي===ماهيب تكثر فـي القرابـه مناقيـد
ابـوي لاعـدّت فعـول الرجالـي===فعله ينومس والخلايـق شواهيـد
ابوي سعد اللـي حدتـه الليالـي===يعطي وغيره يجمعـون التفاريـد
ابوه طيب وجـاه طيـب الخوالـي===راح يتشقح يكسب الطيـب ويفيـد
شيخ وامـام داعيـه مـا يبالـي===يامر وينهى فيـه نخـوه وتوحيـد
حكيـم يفتـل محكمـات الحبالـي===ويحل عقـدة محكمـات المعاقيـد
جمـل محامـل يحتمـل للثقالـي===رايه براسه يعطي الحـق ويزيـد
مـا كنّـه الا نايفـات الجبـالـي===يصبر على زلَة صخاف الجلاميـد
وانا على دربـه بحالـي ومالـي===هرج وكاد وفيـه صملـه وتوكيـد
وان كان ما جتني على شف بالـي===يالله تساعدنـي بحكمـه وتسديـد
يالله ترزقنـي بــرزق حـلالـي===حيثك كريم تعطـي العبـد وتزيـد
عبدالإلـه اسمـع كلامـي لحالـي===وافهم ترى بعض النصايح خثاريـد
اسمـع كـلامٍ فيـه مـرٍّ وحالـي===يقدح كما تقدح قبـوس العباريـد
اسمع كـلامٍ مثـل نقـد الريالـي===والضرب في الميت ترى ما هو يفيد
العقـل للرجـال مثـل العقـالـي===يعقله عن فعـل الخطـا والمناقيـد
اصبر على بقعـا وخلـك شمالـي===واحفظ كتاب الله بحكمـه وتجويـد
واحرص على كسب العلا والمعالي===واذكر جدودك وانتبـه للحواسيـد
ترى الزمن لـه وقفـةٍ وارتحالـي===خلّك شطير والهدف خله خلّه بعيـد
وترى العرب فيهم رخيص وغالـي===فيهم عظيم وفيهم انسـان رعبيـد
فيهم جهول صاب عقلـه خبالـي===ما عاد ينفع فيـه طيبـه وتهديـد
خلّـه لغيـرك ياكريـم السبـالـي===لعـل مقـرود تــرده مقـاريـد
وابد النصيحـه للرفيـق الموالـي===الهرج ليـن لايجـي فيـه تشديـد
وخمس الفرايض عدهـا بالكمالـي===احسن وخلّك ثابت فـي المواعيـد
لي فيك هقوه ياعريـب الخوالـي===آلاد صامـل كاسبيـن المحامـيـد
ارجيـك والله لايخيـب سـوالـي===وسميتك اسم فيـه عـزّه وتمجيـد
ارجي ثوابه مـن عزيـز الجلالـي===اللـي رفـع سبـع بليـا عواميـد
ابديت من فكري على مـا طرالـي===كلام حكمه فيـه موجـز وتمهيـد
وصلاة ربي عـد وبـل الخيالـي===على النبي محـدد الشـرع تحديـد


وســــلامــــتــــكـــــم