فيه تعبير أمريكى عظيم إسمه ( Gold Partner ) أو الشريك الذهبى ..

بإختصار مدلوله إن كل واحد فينا حاجة من أتنين يا إما فى حياته شخص من دهب .. يا إما هو نفسه شخص من دهب بالنسبة للى حواليه .. تحت نفس العنوان " الشريك الذهبى "

• الشريك الذهبى نعمة .. يطلع حبيب أو يطلع صاحب يطلع زى ما يطلع .. المهم إنك ما بتمرش علي الدنيا إلا لو قابلته أو كنت أنت نفسك هو .. معاييره فى التعامل مع الناس بتختلف .. ولإنه دهب فميزانه فى تقييم الناس ميزان الدهب .. الشريك الذهبى دايمًا بابه مفتوح .. إبن أصول .. مكسب .. مش بيتعوض .. بيتخسر مش بيخسر .. مش بيصدأ .. بينصح لله .. " أنيس منصور " لما سأل " عباس العقاد " عن إزاى يعرف أهم شخص فى حياته رد عليه : ( مسيره هينصحك؛ بمجرد ما يحصل دور على مصلحته الشخصية بين كلامه ليك لو مالقتش إفهم إنها خالصة لوجه الله ثم لمحبتك ) .. تعودك على وجوده بيخليك تنسى تدريجيًا أهميته لكن مش بينفيها . هما اللى أتعملت عشانهم جملة ( أنت إزاى كده ) .. قليلين زى كل حاجة حلوة فى الدنيا .. ناس كده تحس إن قلوبهم مغسولة طيبة وأرواحهم متعطرة خير ومعجونين جدعنة .. مش منتظرين منك شكر ولا عايزين غير إنك تكون حلو .. نجدة نازلالك من السما .. ده حتى وجود حد منهم ولو كان قليل وبسيط بس بيكون تعويض عن خذلان من عشروميت واحد .. دوّر عليهم و خلّى بالك ليضيعوا وسط كومة الناس الهوا والفشنك اللى بتتشنكل فيهم ليل نهار، ولو لقيت حد منهم إمسك فيه بإيدك وسنانك و ماتسيبهوش يسيبك .. ربنا يرزقنا تنقية الشريك الدهب ويبعدنا عن لمعة الفالصو......
راقت لي
منقول