|
مصائبك من أقرب الناس إي بالله أخطوا والخطا اللي جابهم عين الصواب مبطي وأنا أشوف الطمع يكشف رداهم وأستره مايملي عيون الحسود بهالزمن غير التراب ومن لايتوب من الخطا تحرم عليه المعذره اللي من أولها خراب أكيد تاليها خراب والبندق اللي ماتثَّور في هدفها تذعره ودك إليا من جاتك الغلطه من الناس القراب الصاحب اللي ماكسبت محبته ماتخسره مشكلتي إني ماعرفت أحسب لصدتهم حساب قلَّطتهم صدري على ذكري قصيد وحنجره صوتٍ يصول بمنبره وخطاب ما بعده خطاب والطيبه اللي زعزعت صوت الخَطيب ومنبره مافيه دمع ٍ صوَّبوه أحبابي بوجهي وخاب ولا زَرَق حزني على غالي ولافج انحره كل الزهاب اللي معي ذكرى من أصحاب الزهاب واللي بقالي من عذاب أشرس طريقي وأخطره لأني تجنبت الغرق عدِّيت من فوق السحاب لأن أكثر أصحابي ورق ماشفت للطيب إثمره والله ماحطيت بين الحقد والخُوَّه حجاب حتى غدوا ربعي يحدوني على الضيق أشكره البارحه ثارت علي رقاب وآوتني رقاب البارحه يا ثقل دم البارح و يا محقره أهَب يا وجه الحسد وشلون جمعهم وغاب كيف السنين اللي عطتني بعثرتهم بعثره أثر المصايب ماتجيك إلا من الناس القراب وبهالزمن حتى الخوي اللي تثق فيه أحذره لابارك الله في رفيق ٍ تزعله كلمة عتاب ولاجمَّع الله الرجال اللي تفرقهم مره عوَّدت نفسي كل ماشددت لليمّه ركاب ما أصد وجهي عن طريق إلا ليا جبت اخبره الصاحب اللي مايجي من صحبته غير العذاب نذر ٍ علي إن ماهجرني وإلا أنا اللي بهجره من يفتح لفرقاي باب أفك له عشرين باب وإذا خويِّي مايقدر خوتي ما أقدره إن روّحوا فأنا بري منهم ليوم الحساب وإن جرَّحوا قولوا لهم ماحركوا فيّ إشعره شفهم لهم حول السنه ولا خذوا مني جواب أحسن دوا للي يحاول يستفزك تحقره أنا جمعت أوراقهم بكتاب وأغلقت الكتاب ياوقت لم اللي تلمه وأنثر اللي تنثره ماكنت أحاتيهم صغَـيِّر ..عاد أحاتيهم شباب إن ما ذخرني صاحبي لليوم الأسود ما أذخره عقب أكتئاب البارحه ماعاد انا حمل إكتئاب الطيب جرجرني وانا ماني بناقص جرجره اللي يخاف من الظما يترك لنا طرد السراب واللي ماهو بقد الظلام ووحشته لا يسهره انا تجرعت الظما لين أحترق وجهي وذاب انا كسرت بخاطري قبل الصداقه تكسره انا خسرت اللي غيابه غير عن كل الغياب انا غفرت لعالمٍٍ ماتستحق المغفره انا أكثر أنسان تعلم من كثر ماأخطا وأصاب انا أخر لسان يتكلم في زمان الثرثره انا القصيد اللي نزع من دفتره مليون ناب وانا الوحيد اللي جمع مليون ناب بدفتره جفني وجرَّحه السهر ، حيلي وهدَّته الصعاب دمعي هدر، ضحكي ندر، عمري وضيعت أكثره شيَّب بعقول العرب..هيبت روس ٍ ماتهاب جمهرت ناس ٍعمرهم مايعرفون الجمهره ماصرت ذيب إلا لأن اللي حواليني ذياب ما كنت أغيب إلا لأن العفو عند المقدره ترى حلاتك لاحملت لصاحبك كلمة عتاب أن مانطقت بها بوجهه ماتذمه بظهره في هالزمن مايملي عيون الحسود إلا التراب والا الحظيظ .. الطلقه اللي ماتصيبه تذعره ودك إليامن جاتك الغلطه من الناس القراب الصاحب اللي ماكسبت محبته ماتخسره حامد زيد بسـم الله الرحمن الرحيم السلام عليــكم ورحمه الله وبركآتهـ { أثـر المصـايب ما تجيك الا من النــاس القرآب ... مقـولة الشـاعر : حــــامد زيـــد مـــا هــو رأيــكــم؟!! هل هيا بالفعــل صحيحـ ـة..؟ أتمنى تتحفونا بمشاركاتكم اذا كنتـــو ممن وآجه هذا الموقف. ومن منكم حصلت له مشكلـة كان سببهـا انسان قريب منه وغالي عليه مــاذا سـتـكـون ردة فعلـه ؟؟. موضوع أعجبني النقاش فيه فأحببت أن أنقله إليكم |
رد: مصائبك من أقرب الناس هيجتي المشاعر وطلعتي المستخبي آآآآآه من الأقارب آآآآآآآآه الأقارب عقارب (أكيد مو كلهم) مقصدي بصفة عمومية يا كثر ما ذوقونا العذاب الموضوع فرصة للفضفضة أكثر ما يزعجني إذا جت وحدة من القرايب وبدأت تسأل عن البنات وحالتهم مين اللي انخطبت ومين اللي متوفقة وأين ساكنين وكيف عايشين ووووو والأولاد من توظف وكم راتبه وكيف يعامل أمه وووو حتى بعضهم يسألون الشغالات إذا ما قدروا يوصلون للمعلومة وإلا يسألوا الأطفال أبوكم ايش جاب وايش عمل وايش غداكم وكيف عشاكم وهما عايشين في حصون وقلاع وكانك بنت أبوك تجرئ واسأليهم عن كلمة :2ar15smilie: وكل اجاباتهم (ما ندري) :mad: وشغالاتهم في المناسبات ما يجيبونهم إذا عندك نعمة حسدوكي وإذا مريتي بنقمة تشمتوا فيكي:36_1_30: |
رد: مصائبك من أقرب الناس في البداية القصيده حلوة والله وهذي من القصايد اللي ببدايات الشاعر حامد زيد وبعدها مدري وش صار عليه الظاهر صكوه عين ولا شعره قوي وماعنده الا القصايد اللي ببدايته وتقريباً هذا الكلام قبل ثمان سنوات وبعدها ما فيه شيء قوي زي أيام أول أما القرايب وما أدراك مالقرايب ، أبوي يقول لي راح تشوف إذا تزوجت أو مرضت أو متت ما في أحد راح يجي لأي حدث يصير لك (( من كثر ما أنا مقاطعهم )) عندي عجوز وحدة أخت جدي الله يرحمه (( أبو أبوي )) أزورها بالشهر مرة علشانه ، وعندي اثنين هم عيال عم أبوي وخالة واحدة كانو طيبين معاي وأنا صغير وصرت أزورهم بالأعياد بس و راح أضيف معهم معهم واحد من خوالي ( أخو أمي ) لأني شفته واقف ويانا يوم مرضت أمي الفترة الأخيرة أما الباقين أعمامي وعماتي وخالاتي وعيالهم مرة والله مقاطعهم لأنهم يجيبو القلق أكثر من الراحة ضحكت على رد ( دفاتر القمر ) وخصوصا أسئلة الناس وأكثر شيء ضحكني أنهم يسألون الشغالات والبزران والله ما توقعت توصل لهذي الدرجة الله يستر منهم ، أما عن السؤال عن الراتب اتذكر واحد سألني ولا يمون ولا أمون عليه لدرجة أن بداية كلامي أنا وهو كان يسألني أنت ولد فلان ؟؟؟؟؟ ؟ يعني لسه يعرفني وقال وين شغال ؟ وقلت له . وقال وش تشتغل بالظبط ؟ واعطيه نص جواب ؟ أما يوم سألني عن الراتب والمشكلة أنه يسألني وعندنا كذا شخص منهم اللي اعرفهم ومنهم اللي ما اعرفهم ؟ وجهي حمر وانحرجت وجالس أقلب الأرقام في راسي (( وقلت بنفسي شكله يشتغل وراتبه 2000 ريال )) وعلى طول أجاوبه وأقول له 1150 ريال <<<< بنقالي ، قريت بعيون الناس أنهم حاسين أني حديته وخليته يدخل مخرج خط القصيم واللي ضحك واللي يتمتم بنفسه ، ما هموني أبوي وأمي وأخواني وأخواتي واللي هم أهلي ما سألوني عن راتبي يجي واحد لسه أعرفه ويسألني عنه !!!!!!!!! على باله أنه ذابحه الاهتمام فيني |
رد: مصائبك من أقرب الناس أكثر الأسئلة ازعاجا والمفروض أي شخص محترم ما يتطرق لها كم راتبك ؟ كم عمرك ؟ كم وزنك ؟ خخخخخخخخخخخخخخخخخخخ |
رد: مصائبك من أقرب الناس الله يبعدنا والله القرايب في الأغلبية ما يجي منهم إلا الحسد والسحر والنميمة ونشر الفضايح وتتبع العورات والأخبار بس صلة الرحم أمر الله بها وحرم قطع الأرحام الأقارب عشان أذاهم الواحد يجي على نفسه ويتواصل معهم لو مكالمات بالجوال |
| كل الأوقات هي بتوقيت GMT +3. الساعة الآن 10:55 AM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd.
Search Engine Optimization by vBSEO ©2011, Crawlability, Inc.